அதிரையின் பெயரை மாற்ற நடைபெறும் சூழ்ச்சி!

அதிராம்பட்டினம் தஞ்சை மாவட்டத்தின் முக்கியமான கடலோர நகரமாக பொருளாதார அளவில் ஓரளவு செழிப்பான நகரமாகவும், மதநல்லிணக்கத்தின் அடிப்படையில் பிற ஊர்களுக்கு எடுத்துக்காட்டாக, இந்து, முஸ்லிம், கிருஸ்தவர்கள் ஒன்றோடு ஒன்று பிண்ணி  பிணைந்து சகோதரர்களாக, மாமன் மச்சான்களாக காலம் காலமாக வாழ்ந்து வரும் ஒரு நகரமாகும். இந்த ஊருக்கு முற்காலத்தில் செல்லிநகர் என்ற பெயரும் பின்னர் அப்பெயர்  அதிராம்பட்டினம் என்று மாறியதாகவும் கூறப்படுகிறது.

ஆனால் அதிவீரராமபாண்டியன் என்ற மன்னன் ஆண்டதால் இந்த ஊருக்கு அதிராமபட்டினம் என்று பெயர் வந்ததால் ஒரு பொய்யான வரலாறு திணிக்கப்பட்டு பலரும் அதையே நம்பி வருகிறோம். இந்த அதிவீரராமபாண்டியன் என்ற மன்னர் கி.பி.1564-1606 கால கட்டத்தில் திருநெல்வேலியைத் தலைநகராகக் கொண்டு ஒரு குறுகிய நலப்பரப்பை விசய நகரத்தின் பிரதிநிதியாய் மட்டும் ஆண்டு வந்தார். வெறும் கவுரவ பதவிகளில் இருந்த இவர் எந்த ஒரு நாட்டையும் கைப்பற்றியதாக சரித்திரத்தில் இல்லை. இந்த நிலையில் நெடுந்தொலைவில் உள்ள அதிராம்பட்டினத்தை எப்படி கைப்பற்ற முடியும்?

அரசாங்க பதிவேடுகளில் அதிராம்பட்டினம் என்று இருக்கும் நிலையில் இதனை சுருக்கமாக அதிரை என்று நாம் அழைத்து வருகிறோம். நாடு முழுவதும் பாஜக, ஆர்.எஸ்.எஸ் அமைப்பினர் சிறிய இடம் கிடைத்தாலும் மதக்கலவரத்தை தூண்டி வரும் நிலையில், மதநல்லிணக்கத்துடன் வாழும் அதிரையில் ஒரு சிலர் மதத்தின் அடிப்படையில் வேறுபாடு காட்டுவதை போன்று நமதூரின் பெயரை அதிவீரராமபட்டினம் என்றும், அதிராமபட்டினம் என்றும் தங்களுக்கு வாய்ப்பு கிடைக்கும் வேலைகளில் எல்லாம் பதிந்து வருகிறார்கள். மதநல்லிணக்கம் தலைதோங்கும் எங்கள் அதிரையில் எந்த விதத்திலும் மதவேறுபாட்டை ஏற்படுத்த முடியாது. இதனை தடுக்க இந்து, கிருஸ்தவ, இஸ்லாமிய சகோதரர்கள் ஒன்றிணைந்து முயற்சிக்க வேண்டும்

ஆக்கம்: நூருல் இப்னு ஜஹபர் அலி

Close